امسك يارب إيدى

+ امسك يارب إيدى زى بطرس زمان
لما قرب يغرق مسكت ايديه بحنان
ورفعته وسط الموج +++ واديته سلام وأمان
وأنا زيه ياربى امسك ايدى كمان
+ الموج عليا عالى يخطف قلبى منى
والريح يارب شديدة وخايف نفسى تخونى
والمركب طالع نازل +++ وصخور بتحطمنى
قول للموج يهدأ وفى صدرك احضنى
+ ادخل يارب سفينتى واملك حياتى تمام
واطرد منى الخوف داوى كل الآلام
اسكن جوة قلبى +++ واملأه بالسلام
ابدا ماتسبنى لوحدى أمشى وسط الأيام
+ إيمانى يارب ضعيف شددنى فى الإيمان
ان يوم انا شكيت فيك أو تهت فى أى مكان
ده أنت يارب أبويا +++ قلبك كله حنان
رجعنى تانى ليك أعيش طول الزمان
+ وفى الأبدية ياربى أتمنى أكون معاك
جهز لى هناك مكان علشان أكون وياك
مهما كانت ضعفاتى +++ مالى يارب سواك
أنت تستر عليا وتفرحنى برؤياك